Home

Islami

   Kur'an

   Hadith

   Ramazan

   Falja/Namazi

   Haxhi

Vajza Muslimane

Familja
Edukimi i Femijeve

Faqa e Femijeve

Shkence

Shendeti

Kuzhina

Arti Islam

Lirika

Kendi i Librit

Links

Kuiz
Fjalori i Faqes

Per Burimi.net

Kontakto Burimin

Ne Emer te Allahut, Meshiruesit, Meshireberesit

NE SHTYP

Si e pasqyroi shtypi shqiptar ngjarjet per disa motra muslimane qe nuk u lejuan te ndjekin studimet ne disa shkolla ne Shqiperi pse vendosen te mbajne Hixhabin apo shamine, simbolin e besimtares Muslimane.

• Nuk pranohen në mësim katër nxënëse me ferexhe

• "Veprimi i papranueshëm, na jep të drejtë Kushtetuta"

• Një tjetër e pëson nga ferexheja

• "Unë nuk e heq ferexhenë"

• "Zgjodha dijen në vend të shamisë"

• Katër nxënëset heqin ferexhetë: Vajzat e Gjuhëve të Huaja i binden drejtorit

• Ferexhetë, kthehet edhe një vajzë në shkollë

Nuk pranohen në mësim katër nxënëse me ferexhe

Marre nga Gazeta Shqiptare online me 26/01/01

TIRANE -Nuk kishte shumë kohë që ishin "mbuluar". Për to ishte e rëndësishme feja, e vetë praktikat e saj. Aq sa shaminë të mos e hiqnin kurrë nga koka. Madje, as në shkollë. Por drejtori i shkollës, nuk i ka pranuar në mësim. Eshtë historia e katër vajzave të shkollës së mesme të gjuhëve të huaja në kryeqytet, të veshura me ferexhe.

Të gjitha konviktore. Brenda janarit, u ish mbushur mendja se të mbuloheshin, ishte mënyra më e mirë për të respektuar fenë e tyre, myslimanizmin. Në fillim erdhi e para në mësim, mbuluar nga koka në këmbë. Nuk vonoi, dhe pati disa "si vetja" në shkollën ku ajo mësonte. Porse vetëm disa ditë kanë hyrë në shkollën e tyre, të mbuluara. Drejtori i shkollës, në bazë të rregullores, vendos të mos lejojë asnjë prej tyre të hyjë në mësim me shami. Vajzat nuk kanë pranuar t'i heqin, dhe janë kthyer mbrapsht.

Rregullorja
Vajzat konviktore nga Dibra, Bulqiza e Kavaja, nuk kanë hyrë në mësim. U është treguar menjëherë rregullorja, sipas të cilës, asnjë nxënës nuk mund të vijë në shkollë me veshje jo korrekte. Këtu është zanafilla e problemeve që pasuan njëri-tjetrin. Rregullorja, e bërë në fillim të vitit, përcakton se të gjithë nxënësit duhet të kenë paraqitje të jashtme korrekte (veshje, tualet, higjienë), dhe në raste ekstreme - e shohim të nënvizuar në rregullore - nuk do të pranohet në mësim. Këtu kanë pasur mundësi të "kapen" konviktoret, pasi fjalët janë përgjithësuese, dhe askund nuk është e përcaktuar konkretisht se nuk lejohet shamia në kokë. Po në këtë rregullore - porse kësaj radhe të rinovuar - që mban datën 18 janar 2001, saktësohet se për të gjithë ata nxënës që nuk e kanë kuptuar rregulloren, apo e kanë keqinterpretuar atë, veshjet e palejueshme janë minifundi, kanatjerja dhe shamia në kokë. Sipas drejtorit të shkollës, Preng Vata, kjo është rregullorja e firmosur nga vetë nxënësit, që përfaqësohen nga senati i shkollës.

Thirren prindërit
Janë lajmëruar vetë prindërit e vajzave. Kanë mbërritur me një frymë për të ditur ç'kish ndodhur me vajzat e tyre. Disa prindër e dinin se vajza e tyre e kish zgjedhur tashmë, të vishej. Por jo të gjithë. "Njëri prej tyre, kur ka parë të bijën me shami në kokë, ka dashur t'ia heqë menjëherë (prindi nuk e dinte se e bija ish veshur)", tregojnë konviktoret, shoqet e atyre siç thonë vajzat, "që falen shumë". Vajzat, njëra në vit të tretë, dhe të tjerat në vitin e katërt, janë para dilemës. Të mbajnë ferexhenë, apo të shkojnë në shkollë. Njëra prej tyre ka ikur tashmë, në shtëpinë e saj në Dibër, qyteti nga vinte. Studionte për anglisht, në vitin e tretë, tani e ka lënë shkollën. Vetëm për të mos hequr dorë nga ferexheja. Ndërsa të tjerat kanë presionin e shkollës, të prindërve, dhe një pikëpyetje të madhë përpara vetes, ferexhenë, apo shkollën? Përveç të larguarës, janë të gjitha maturante. Viti i fundit i shkollës së përkthyesve. Prindërit këmngulin që vajzat të vazhdojnë shkollën, por edhe nuk i forcojnë të heqin dorë nga praktikat e fesë. Ndërsa ato janë mes dilemës për diplomën e shkollës së mesme, dhe besnikërisë ndaj myslimanizmit. Situata është e tillë prej dy-tre ditësh. Drejtori ka vendosur të mos bëjë asnjë lëshim, dhe vajzat që duan të vazhdojnë të mbajnë dhe të respektojnë, praktikat e fesë së tyre. "Pas shkollës, ato mund të vishen e të mbulohen me shami. Në shkollë nuk lejohet", thotë drejtori Vata.

Ministria
Mbyllja e derës për vajzat e veshura, ka vënë në lëvizje edhe vetë dikasterin e Rukës, por që "ia ka lënë në derë" vetë drejtorit zgjidhjen e këtij problemi. Sipas juristit në Ministrinë e Arsimit, në bazë të nenit 41, veshja për nxënësit, përcaktohet nga rregulloret e brendshmë të vetë shkollave. Nuk janë mjaftuar me këtë përgjigje përfaqësuesit e Ministrisë së Arsimit, por edhe me dërgimin e disa punonjësve, në shkollën e mesme të gjuhëve. Ata i kanë dhënë të drejtë drejtorit, i cili ka zbatuar rregulloren e brendshme të shkollës së tij. "Ky është një problem që duhet zgjidhur nga vetë palët". Ky ka qenë reagimi zyrtar i dikasterit të Rukës për vajzat që nuk pranohen në mësim pasi mbajnë ferexhe. Vajzat, me t'u larguar nga shkolla, kanë troktitur në dyert e Komunitetit Mysliman, për të gjetur një mbështetje për problemin e tyre. Ankesat më pas kanë mbërritur në dyert e Ministrisë së Arsimit. Vetë përfaqësuesit e fesë kanë trokitur në dyert e dikasterit të Rukës, që të gjendet zgjidhja për këto vajza. "Ne nuk i njohim ato, sepse janë nga rrethet, por kemi vendosur t'i ndihmojmë", thonë përfaqësuesit e fesë myslimane.

"Veprimi i papranueshëm, na jep të drejtë Kushtetuta"
http://www.balkanweb.com/gazeta/sociale/sociale2.htm

Ngjarja, e paprecedent, nuk ka mbetur veçse në kornizat e një ballafaqimi mes nxënësve dhe drejtorit të tyre. Kanë reaguar edhe përfaqësuesit e Komunitetit Mysliman shqiptar. Vetë nënkryetari i komunitetit, thotë për Gazetën se kjo që bëhet është një gjë krejt e papranueshme, pasi praktikat e fesë, lejohen të shfaqen në publik, edhe nga vetë Kushtetuta. Dokumenti themeltar i shtetit, saktëson se askush nuk mund të detyrohet ose të ndalohet të marrë pjesë në një bashkësi fetare ose në praktikat e saj, si dhe të bëjë publike bindjet dhe besimin e tij. Një tjetër përfaqësues i Komunitetit Mysliman, Ervin Hatibi, shkon edhe më tej duke thënë se askush nuk mund të diskriminohet për bindjet fetare. "E kemi edhe në Kushtetutë", thotë Hatibi. Porse ka një shtesë... "nëse nuk ekziston një përligje e natyrshme dhe objektive". Për këtë reagon edhe drejtori i shkollës që thotë se janë kompetencat e tij dhe të institucionit që ai drejton, të përcaktojë rregulloren e shkollës. Përfaqësuesit e fesë myslimane, thonë se në rregullore frazat janë të përgjithshme. "Kush mund ta thotë ç'është e përshtatshme, korrekte, apo e duhur, për një person, dhe një tjetër", thotë Hatibi.

Një tjetër e pëson nga ferexheja
Dukuria lind në Fier, Edlira s' pranohet në mësim

http://www.balkanweb.com/gazeta/sociale/sociale1.htm
13 Shkurt 2001

FIER- Një tjetër vajzë "e pëson" nga shamia. Këtë radhë, në Fier. Madje, dukuria "ferexhe" zë fill pikërisht në këtë qytet. Nuk ishin të parat katër vajzat e shkollës së mesme të gjuhëve të huaja në Tiranë, që "u njohën" si raste të paprecedent të shamive.

Vajza e parë e mbuluar "zbulohet" në gjimnazin "Janaq Kilica" në qytetin e Fierit. Prej fillimit të vitit, Edlira Dylmishi, në vitin e dytë, është paraqitur në shkollë e mbuluar nga koka në këmbë. Askush s'e ka trazuar. Pa ditur ç'të bënin - s'kish ndodhur më parë - përfaqësuesit e Drejtorisë Arsimore, kanë kërkuar një përgjigje nga Ministria e Arsimit. Ja si shkoi historia...

Prisni
Nuk kish ndodhur më parë. Një nxënëse në vitin e dytë, e ka nisur vitin, "me ferexhe". Ministria e Arsimit, ka "këshilluar" të mos bëhet zhurmë për momentin, duke qenë se ky ishte rasti i parë, dhe krejt i izoluar. Ndërkohë, drejtori i shkollës, mbështetur nga Drejtoria Arsimore, i kanë kërkuar vajzës të reflektojë, pasi me këtë veshje, nuk do të pranohej në mësim. Madje, është përjashtuar për dy javë, në tetor të vitit të kaluar. Por është rikthyer, pasi argumentet nuk kanë qenë bindëse. Ka vazhduar kështu deri në "ndezjen" e çështjes "ferexhe" në kryeqytet. Pas vendimit të prerë të Ministrisë së Arsimit, reagojnë edhe drejtuesit lokalë, ndaj nxënëses në vitin e dytë.

Përjashtimi
Sot, pas urdhrit të Ministrisë, Edlira nuk do të pranohet në mësim. "Ne nuk e pranojmë, pasi kemi rregullat dhe ligjet e shtetit. Shkolla është laike", thotë për Gazetën, drejtori i Drejtorisë Arsimore të Fierit, TosiProho. Ajo ka vazhduar të ndjekë mësimin ditë pas dite, ndërsa për të tjera "si ajo", bëhej zhurmë e zallamahi e madhe në kryeqytet. Proho, ka urdhëruar drejtorin e shkollës, të mbledhë këshillin e prindërve dhe të mësuesve, për të marrë vendimin përfundimtar për gjimnazisten nga Fieri. "Unë kam qenë i prerë që në fillim. Në bazë të dispozitave normative të shkollës, ajo vajzë nuk do të pranohet në mësim me këtë veshje", thotë drejtori i Drejtorisë Arsimore.

Ndryshe nga rastet e katër konviktoreve "të mbuluara" në kryeqytet - që nuk i kanë pranuar prindërit - nxënësja në vitin e dytë në Fier, ka pasur mbështetjen e familjes së saj.

"Unë nuk e heq ferexhenë"

http://www.balkanweb.com/gazeta/sociale/sociale2.htm
13 Shkurt 2001

FIER - Ndërsa të gjithë lëvizin gjatë pushimit mes orëve, Edlira qëndron kokëulur, aty, në bankën e cepit. Eshtë dita e fundit që i lejohet të vijë në shkollë. Tashmë, është vendosur, me ferexhe, nuk do të pranohet në mësim. Drejtori i shkollës, Dashnor Mehmeti, thotë se kanë marrë urdhër nga Ministria. Ndërsa nuk kanë munguar edhe ankesat e mësuesve, sidomos asaj të fiskulturës, që nuk e kanë pranuar veshjen
e Edlirës. Nxënësja në vitin e dytë, ka pranuar të tregojë për Gazetën, historinë e saj, muajt me ferexhenë.

Nesër është afati i fundit për heqjen e ferexhesë. Ti si do veprosh?
"Nëse do më lënë të vij në shkollë e veshur, unë nuk do ta lë shkollën, nëse jo, jam e detyruar, edhe pse më vjen shumë keq. Këtë veshje nuk e heq. Unë mendoj se me termin laik, është abuzuar. Përderisa kjo shkollë nuk ka një rregullore, përderisa këtu vishet minifundi, përse duhet të pengohem unë të mbaj shaminë? Unë kam sakrifikuar për islamizmin, nuk e kam ndërmend ta heq".

Pastaj, ç'do bësh?
"Unë nuk do rri pa shkollë. Nëse nuk më pranojnë këtu, do të shkoj në Tiranë, dhe do të vazhdoj një shkollë fetare".

Këtë veshje e kanë pranuar prindërit?
"Unë jam rritur me një edukatë të theksuar fetare, edhe mamaja ime është e veshur. Ata më kanë mbështetur. Pastaj, i fejuari im që është me fenë në Tiranë, nuk do më linte".

"Zgjodha dijen në vend të shamisë"

http://www.balkanweb.com/gazeta/sociale/sociale1.htm

Që prej ditës së djeshme, është si gjithë të tjerat. Ka vendosur të heqë shaminë, dhe t'i kthehet shkollës. Vendimi ka qenë i vështirë, por "unë zgjodha dijen në vend të shamisë", tregon për Gazetën, Marjana, maturante te gjuhët e huaja, një nga vajzat që vendosi "të zbulohej". E shohim të veshur me një fund të gjatë, që - edhe pse me taka - shpesh has në tokë. Vetëm një javë kishte që ishte veshur. Ka qenë një vendim i marrë larg familjes. Askush nuk e ka ditur se gjatë një jave, maturantja nga Kavaja, kish vendosur të zbatonte deri më një praktikat e fesë, që aq shumë respektonte. Nuk ka zgjatur shumë mbajtja e ferexhesë për Marjanën nga Kavaja. Teksa rrëfen, shikon majat e këpucëve të saj. As në shkollë, as jashtë saj, nuk mban më shaminë. "Tani nuk ia vlen më. S'mund ta mbaj në dhomë, dhe kur dal në shkollë , ta heq", thotë ajo. Të ndiqte shkollën, apo të praktikat e myslimanizmit. Vetë adoleshentja nuk do kish dashur të ishte në mes një dileme të tillë, por, më në fund ka vendosur. "Nuk mund të hiqja dorë nga shkolla, për të mbajtur shaminë", tregon Marjana. Ajo nuk diskuton më rregulloren. Sipas saj, drejtori vendosi që ato vajza të mos hynin në mësim. Përmend vagullt Kushtetutën, që i jep të drejtë asaj, dhe myslimaneve të tjera të veshura... Porse tashmë është "përulur". Kanë qenë edhe prindërit e vajzës, që kanë bërë presion tek
adoleshentja. Tani Marjana nuk mban më shami, por vazhdon të shkojë rregullisht në shkollë.

Katër nxënëset heqin ferexhetë: Vajzat e Gjuhëve të Huaja i binden drejtorit

http://www.balkanweb.com/gazeta/sociale/sociale2.htm
27 Janar 2001

TIRANE - Drejtori arrin "të zhveshë" vajzat me ferexhe. Konviktoret, që nuk janë lejuar në mësim pasi mbanin shaminë, tashmë, janë rikthyer në shkollë. Por, këtë radhë, "të zbuluara". "Tre prej tyre, sot janë në mësim", thotë për Gazetën drejtori i shkollës së mesme të gjuhëve të huaja, Preng Vata.

Vajzat që mësojnë në shkollën "Asim Vokshi", kanë zgjedhur të respektojnë rregulloren e shkollës në vend të praktikave të fesë së tyre. Të paktën në mësim, nuk do ta mbajnë shaminë. Nga Dibra, Bulqiza dhe Kavaja, tre vajzat janë maturante në këtë shkollë. Rregullorja, presioni i prindërve... dhe më shumë se një zgjedhje, të zbulohen, ka qenë e vetmja zgjidhje. Por, pasi lënë ambientet e shkollës, secila mund t'i rikthehet ferexhesë.

Vendimi
Tani shkojnë në shkollë, si edhe më parë, të pambuluara. Dy nga vajzat, kanë vendosur t'i heqin "për fare" shamitë. "Kur e heq në shkollë, s'ka më kuptim ta mbaj. S'mund të bëhet herë me shami, e herë pa të", tregon Marjana, një nga vajzat që është zbuluar tashmë. Vetëm një prej tyre është në dilemë. Të rimbulohet me të nxjerrë këmbët nga shkolla, apo ta heqë fare, si shoqet... Më shumë se mendimi i adoleshenteve, kanë thënë fort fjalën e tyre, prindërit e konviktoreve. Vajzat kishin vendosur të respektonin deri në fund praktikat e fesë së tyre, myslimanizmit. Debati ka qenë i ashpër, porse në fund, maturantet do të përballeshin me zgjedhjen mes dy alternativash. Në prag të marrjes së diplomës, e kanë parë të udhës të zgjedhin shkollën, e të heqin dorë nga ferexheja. Rregullorja e brend-shme e shkollës, e mirëpërcakton se veshjet jo korrekte, që nuk lejohen të mbahen nga nxënësit, janë minifundi, kanatjerja dhe shamia.

Reagime
Kanë hequr vetëm shaminë. Me fundet që lënë të duken veçse majat e këpucëve, prezantohen çdo ditë në shkollën e mesme të gjuhëve të huaja në kryeqytet. "Si t'i dallosh? Janë ato të veshura me funde të gjata", të përgjigjen konviktoret, shoqet e vajzave që deri dje, mbuloheshin me shami. I gjejmë teksa presin të hapet konvikti. Eshtë mesditë, ende nuk ka shkuar ora të hapet dera. Rrinë kokëulur. Nuk janë çmësuar ende të rrinë "zbuluar", edhe pse për fare pak kohë kanë mbajtur shaminë. "Ka shumë nga ato që luten, njëra iku fare, e la shkollën, e kishim shoqe klase", tregon një nga vajzat që mëson në vitin e tretë për anglisht. Reagimet janë të ndryshme. Disa mendojnë se ashtu siç nuk lejohet minifundi, ashtu të mos lejohet edhe shamia. Porse njëra prej vajzave, deri dje të veshura, thotë e revoltuar: "C'i bën shamia, u ha bukën?". Megjithatë, të gjitha kanë vendosur, edhe pse të detyruara, të zgjedhin shkollën, duke hequr shaminë.

Ferexhetë, kthehet edhe një vajzë në shkollë

http://www.balkanweb.com/gazeta/sociale/sociale1.htm
22 Shkurt 2001

TIRANE - "Zhvishet" edhe një prej nxënëseve me shami te shkolla e mesme e gjuheve të huaja. Mbetet, e fundit "e ferexheve". Ermira, nxënësja në vitin e tretë të shkollës "Asim Vokshi", një muaj pas largimit, është kthyer në mësim. I ati i saj, Xhevat Dani, nga Dibra, pak kohë më parë, denoncoi në Gazetë komunitetin mysliman që "gënjyen vajzën e tij".

Odiseja e vajzës "më kokëfortë" ka marrë fund. Po kështu edhe sorollatjet e prindit nga Dibra në rrugët e kryeqytetit. Pas shumë mundimesh, Ermira është "bindur", dhe prindi ka lënë i qetë Tiranën. Ndërsa Avokati i Popullit, vazhdon të shqyrtojë çështjen, edhe pse vetë denoncuesja - vajza nga Dibra - është kthyer në shkollë.

Kthimi Ka disa ditë që Ermira i është rikthyer bangave të shkollës. "Që ditën e premte, ka ardhur edhe një nga nxënëset", thotë drejtori i shkollës, Prelë Vata. Megjithatë konviktorja, nuk e ka hequr "për fare" shaminë. Me të vënë këmbët jashtë rrethimit të hekurt të "Asim Vokshit", nxënësja e vitit të tretë, nxiton "të mbulohet". Në ambientet e shkollës e gjejmë me kokën "zbuluar", ndërsa rreket të fshihet nën shaminë e kthyer në shall, vetëm për orët e mësimit. Ajo nuk do të shohë njeri, as babanë... që e detyroi të hiqte dorë - pjesërisht - nga veshja që mban "në emër të Allahut".

Historia
Ermira ka qenë më e vendosura. Veshjen që mbante për të respektuar myslimanizmin, s'mund t'ia hiqte askush, as i ati i saj... Si tre të tjera të shkollës së mesme të gjuhëve të huaja, Ermira nuk është pranuar në mësim, pasi rregullorja e shkollës nuk lejonte një veshje të tillë. Vendimi ka qenë i vështirë, por në fund, pas tre vitesh që studionte për anglisht në shkollën e mesme të gjuhëve, ka vendosur të kthehet në vendin e saj, në Maqellarë të Dibrës. Pas disa ditësh, është kthyer në Tiranë, bashkë me të atin. Teksa orvatej të gjente një zgjidhje, "në të mirë" të saj, Xhevati, babai i saj, kërkonte me ngulm që Ministria e Arsimit, të mos lëvizte nga vendimi për mospranimin në mësim të "atyre me shami". Vajza më në fund është "nënshtruar", dhe i ati e ka shoqëruar vetë Ermirën në bangat e shkollës. 

Bindja
Presioni ka qenë i gjithanshëm. Por po aq edhe suporti i komunitetit mysliman. Gjendja ka mbetur pezull për një muaj. Por në fund, Ermira është "dorëzuar". Në ambientet e shkollës, shaminë e mban hedhur rreth qafës. Më pas, i rikthehet veshjes "në emër të Allahut", për pjesën e mbetur të ditës. Nuk ka qenë vetëm këmbëngulja e të atit. Fjalën e fundit, e kanë thënë të tjera "si ajo". "E kanë bindur ca vajza studente, që vetë janë të mbuluara", thotë nëndrejtori i konviktit të shkollës së gjuhëve, Luan Zajmi. Edhe pse vetë drejtori ka dhënë një urdhër për mospranmimin as në konvikt të vajzave me ferexhe, ato vazhdojnë të qëndrojnë aty, derisa... "të dalë një urdhër i shkruar",
thotë Zajmi.

Avokati i Popullit
Avokati i Popullit prej kohësh ka marrë në dorë çështjen "ferexhe", për të cilën pritet të japë një gjykim. Pikërisht interpretimin e vendimit të Ministrisë së Arsimit. "Çështja është në proces". Eshtë kjo përgjigjja që ka Avokati i Popullit, Dobjani, lidhur me të përfolurat "raste me shami". I vetmi denoncim i mbërritur në dyert e këtij institucioni, është ai i vajzës nga Dibra. Ndërsa Ermira është kthyer në mësim, Avokati i Popullit, thotë se çështja është ende në proces. Brenda afatit të përcaktuar nga Dobjani, çështja "ferexhe" zgjidhet vetvetiu, pasi nxënëset përjashtohen nga plotësimi i numrit të mungesave. Ndërsa drejtori i Arsimit të Mesëm, Rexhep Çuko, thotë se Avokati i Popullit ka vetëm pozicion këshillues. Vendimi është marrë, dhe askush s'mund ta ndryshojë, pasi janë ligjet e shtetit.

Komisioni
Eshtë mbledhur edhe komisioni shtetëror i kulteve. Për herë të parë në një seminar në lidhur me problemet fetare në Shqipëri. Eshtë pikërisht ky komision që duhej të përcaktonte nëpërmjet marrëveshjeve, marrëdhëniet mes shtetit dhe komuniteteve fetare. Mësojmë se është prekur edhe rasti i "vajzave me shami". Një nga përfaqësuesit e OSBE-së ka pasur opsionet e tij, në lidhje me ferexhetë, dhe vendimet për mospranimin e tyre në institucionet arsimore.

www.BURIMI.net